Os días 16, 19 e 21 de decembro, Charamela celebrou as tan esperadas audicións de Nadal. As dúas primeiras tiveron lugar nas instalacións da escola, mentres que a terceira, cun ambiente aínda máis festivo, desenvolveuse na emblemática Casa da Cultura de Pontedeume, grazas á colaboración do Concello de Pontedeume.
Repertorio audición 16 decembro
Repertorio audución 19 decembro
As audicións son sempre un momento único e especial para a nosa comunidade musical. Para o profesorado, representan unha oportunidade de ver como o seu esforzo e dedicación se materializan nos progresos do seu alumnado. Para o alumnado, son a ocasión perfecta para amosar, diante de familiares e amigos, os avances logrados con traballo e paixón ao longo do curso.
O público non defraudou: nas tres xornadas, as salas estiveron cheas de asistentes entusiastas que premiaron cada interpretación con agarimosos e emocionados aplausos, convertendo cada audición nunha experiencia inesquecible.
Queremos destacar o esforzo e compromiso de todo o equipo docente de Charamela, especialmente de Robin, profesor de percusión e coordinador do profesorado. A súa incansable dedicación foi clave para que estas actividades fosen un éxito rotundo.
Desde Charamela, queremos agradecer ao Concello de Pontedeume o seu apoio constante e a cesión da Casa da Cultura, un espazo que contribuíu a dar un marco inmellorable ás nosas audicións.
Por último, desexamos un Bo Nadal a toda a gran familia de Charamela. Que a música siga enchendo de alegría e unión os nosos corazóns.
