O pasado sábado 12 de abril ás 20:30 tivo lugar na Igrexa Parroquial de Santiago de Pontedeume o acto que, ano tras ano, marca o inicio da Semana Santa eumesa: o pregón e o concerto da Banda da Escola de Música Charamela. O evento congregou a un público numeroso que encheu o templo e que puido gozar dunha velada musical e reflexiva, chea de simbolismo e tradición.
O pregón correu a cargo de Dª Carmen Sánchez Castro, presidenta da Agrupación músico-vocal Alegre Intermezzo, quen fixo unha intervención sensible e ben documentada, que conseguiu conectar cun público diverso. Carmen, coa súa longa traxectoria vinculada ao mundo coral e educativo, falou desde dentro e con coñecemento de causa. A súa voz combinou a emoción do recordo persoal coa reivindicación da identidade colectiva, cun discurso que puxo en valor a riqueza histórica e simbólica da Semana Santa eumesa.
Fixo un percorrido pola evolución das tradicións locais dende o século XVII ata hoxe, lembrando figuras e feitos senlleiros como a chegada da imaxe da Virxe dos Dolores dende México ou a emotiva procesión do “Paso”, marcada pola música e o silencio. A pregoeira destacou tamén o papel imprescindible da música nestes actos, desde as marchas procesionais ata os cantos litúrxicos, e puxo en valor o traballo dos músicos —profesionais e afeccionados— que fan posible esta solemnidade. Non faltaron as palabras de recoñecemento para as mulleres da cofradía, para o voluntariado e para todo o tecido social que fai posible a Semana Santa.
O acto continuou co concerto da Banda da Escola de Música Charamela, que interpretou un programa especialmente seleccionado para esta ocasión. A música elevou o ambiente xa cargado de emocións, reforzando a sensación de que Pontedeume inicia a súa semana grande con forza e coidado.
Con este pregón e concerto, a comunidade eumesa deu o pistoletazo de saída a unha das súas celebracións máis sentidas. Un acto coidadosamente preparado e perfectamente executado que reflicte o compromiso do pobo coa súa identidade e tradicións.
